అనంత్ అంబానీ స్థాపించిన జంతు సంరక్షణ, పునరావాస కేంద్రం ‘వంతారా’పై సుప్రీంకోర్టు కీలక ఆదేశాలు జారీ చేసింది. జంతు చట్టాల ఉల్లంఘన ఆరోపణల నేపథ్యంలో ఈ సంస్థపై నిజనిర్ధారణ విచారణకు సుప్రీంకోర్టు ఆదేశించింది.
ఎస్.ఐ.టి విచారణ:
గుజరాత్లోని జామ్నగర్లో ఉన్న వంతారాపై స్పెషల్ ఇన్వెస్టిగేషన్ టీమ్ (SIT) ఆధ్వర్యంలో విచారణ జరగనుంది. వన్యప్రాణులను చట్టవిరుద్ధంగా తరలిస్తున్నారన్న ఆరోపణలు, అలాగే విదేశీ జంతువులను నియమ నిబంధనలకు విరుద్ధంగా భారత్లోకి తీసుకొస్తున్నారన్న ఆరోపణలపై సుప్రీంకోర్టులో ఒక పిటిషన్ దాఖలైంది. దీనిపై విచారణ జరిపిన న్యాయస్థానం ఈ నిర్ణయం తీసుకుంది.
సుప్రీంకోర్టు నియమించిన ఎస్.ఐ.టి బృందం వంతారాలో జరుగుతున్న కార్యకలాపాలపై లోతుగా పరిశీలించి, జంతు సంరక్షణ చట్టాలు పాటించబడుతున్నాయా లేదా అనే అంశాలపై నివేదిక సమర్పించనుంది. ఈ నివేదిక ఆధారంగా తదుపరి చర్యలు తీసుకునే అవకాశం ఉంది.
వంతారా విశేషాలు
గుజరాత్లోని జామ్నగర్లో 3000 ఎకరాల విస్తీర్ణంలో ఉన్న వంతారా ప్రాజెక్టును రిలయన్స్ ఇండస్ట్రీస్ చైర్మన్ ముఖేష్ అంబానీ కుమారుడు అనంత్ అంబానీ స్థాపించారు. ఇది జంతు సంరక్షణ మరియు పునరావాస కేంద్రంగా పనిచేస్తుంది. ఈ కేంద్రం ప్రపంచవ్యాప్తంగా గాయపడిన, క్రూరత్వానికి గురైన జంతువులకు రక్షణ కల్పించి, వాటికి వైద్య చికిత్స అందిస్తుంది. వన్యప్రాణులకు పునరావాసం కల్పించడంలో ఈ ప్రాజెక్టు కీలక పాత్ర పోషిస్తోంది. ఈ ప్రాజెక్టుపై గతంలో కూడా పలు విమర్శలు వచ్చాయి. అయితే, రిలయన్స్ సంస్థ ఈ ఆరోపణలను ఖండించింది.
Read More : జమ్మూ-కశ్మీర్ సరిహద్దులో పాక్ డ్రోన్ల చొరబాటు
