వింటర్ వైరస్ | వింటర్ వైరస్లకు వెరవొద్దు.. సీజనల్ వ్యాధుల్ని తప్పించుకుందాం ఇలా..
శీతకాలంలో సహజంగానే వైరస్ల ప్రభావం ఎక్కువగా ఉంటుంది. వీటితోపాటు బ్యాక్టీరియాలు కూడా తమ ప్రతాపాన్ని చూపుతున్నాయి. కొన్ని వైరస్లలోని జన్యువులలో ఉత్పరివర్తనలు (మ్యుటేషన్) జరగడం వల్ల కొత్తరకం వైరస్లు ఏర్పడతాయి. ఇవి మందులకు తొందరగా లొంగవు మరియు వేగంగా వ్యాప్తి చెంది విజృంభిస్తాయి. కొన్ని సమయాల్లో ఈ వైరస్లు మహమ్మారి (ఎపిడిమిక్)గా మారే ప్రమాదం కూడా ఉంటుంది.
గతేడాది చలి కాలంలో ఎడినో వైరస్ పిల్లలపై తీవ్రమైన ప్రభావం చూపింది. ఈ సంవత్సరం ఇన్ఫ్లూయెంజా, మైకోప్లాజ్మా, ఆర్ఎస్ వైరస్లు పిల్లలకు ఎక్కువగా సోకుతున్నాయి. మైకోప్లాజ్మా ఈ సీజనులో తీవ్రమైన ప్రభావాన్ని చూపుతుంది. చలికాలంలో చిన్నారులు సీజనల్ వ్యాధుల బారిన పడే ప్రమాదం ఎక్కువగా ఉంటుంది. ఈ వ్యాధుల కారణంగా కలిగే అనర్థాలేమిటి? మైకోప్లాజ్మా వల్ల చిన్నారులు ఎలా కాపాడుకోవాలి? ఆ వైరస్కు గురైతే ఎలా గుర్తించాలో తెలుసుకుందాం.
వింటర్ వైరస్లు
చలికాలంలో అనారోగ్యం కలిగించే వైరస్లను ‘వింటర్ వైరస్’ అంటారు. వీటిలో రైనో వైరస్, ఎంటిరో వైరస్, కరోనా వైరస్, ఇన్ఫ్లూయెంజా (ఫ్లూ) పిల్లలకు ఎక్కువగా సోకుతాయి. ఈ సీజనులో ఆర్ఎస్వీ, మైకోప్లాజ్మా బ్యాక్టీరియా కూడా ప్రభావం చూపుతాయి. ఈ సీజనులో 1-5 సంవత్సరాల పిల్లలు ఎక్కువగా ఆర్ఎస్ వైరస్ బారినపడుతుంటారు. అలాగే ఒక్కో సంవత్సరంలో ఒక్కో రకమైన వైరస్ మహమ్మారి (ఎపిడిమిక్)గా మారుతుంటుంది.
మైకోప్లాజ్మా
ఈ సంవత్సరం మైకోప్లాజ్మా బ్యాక్టీరియా విజృంభిస్తున్నది. ఇది పిల్లల్లో న్యుమోనియా కలిగిస్తుంది. సాధారణంగా 5 సంవత్సరాల పైబడిన పిల్లలకు సోకుతుందని అనుకుంటాం కానీ, ఈ సీజనులో 5 సంవత్సరాల కింద చిన్నారులకు కూడా ఇది వస్తోంది. ఈ బ్యాక్టీరియా వల్ల న్యుమోనియా బారినపడిన పిల్లల సంఖ్య పెరిగింది. మైకోప్లాజ్మా విజృంభించడానికి ఇదే తొలిసారి.
మైకోప్లాజ్మా లక్షణాలు
- జ్వరం
- దగ్గు
- ఆయాసం
- శ్వాస సమస్య
- శరీరంపై ఎర్రని చారలు
- రక్త కణాలు త్వరగా క్షీణించడం
నిర్ధారణ పద్ధతులు
- లక్షణాల ఆధారంగా వ్యాధి అంచనా
- ఐజీఎం పద్ధతిలో రక్త పరీక్షలు
- పీసీఆర్ పరీక్షలు
చికిత్స
మైకోప్లాజ్మా సోకిన పిల్లలకు ప్రత్యేకమైన చికిత్స లేదు. లక్షణాల ఆధారంగా సపోర్టివ్ ట్రీట్మెంట్ ఇవ్వాలి. న్యుమోనియా బారినపడితే ఆ పరిస్థితికి అనుగుణంగా చికిత్స చేయాలి. కొందరికి ఐసీయూ చికిత్స అవసరమవచ్చు. ఆలస్యం చేస్తే ప్రమాదకరంగా పరిణమించవచ్చు.
ఆర్ఎస్ వైరస్
ఆర్ఎస్వీ (రెస్పిరేటరీ సిన్షీషియల్ వైరస్) కూడా ఒక సీజనల్ వైరస్. ఇది జూలై నుండి డిసెంబర్ మధ్య ఎక్కువగా ప్రభావం చూపుతుంది. గుండె సమస్యలున్న పిల్లలు, ప్రీ-మెచ్యూర్డ్ పిల్లలు ఈ వైరస్ పట్ల ఎక్కువగా ప్రభావితమవుతారు. ఇది ఇతర వ్యక్తులకు దగ్గడం, తుమ్మడం, నోటి తుంపర్ల ద్వారా వ్యాపిస్తుంది.
వ్యాధి లక్షణాలు
- జలుబు
- దగ్గు
- స్వల్ప జ్వరం
- ఆయాసం
- ఊపిరితిత్తుల్లో వాయు నాళాలు మూసుకుపోవడం
చికిత్స
ఆర్ఎస్వీకి ప్రత్యేకమైన మందులు లేవు. లక్షణాలు బట్టి చికిత్స చేయాలి. కొందరికి ఐసీయూ చికిత్స అవసరం కావచ్చు. 1-5 సంవత్సరాల పిల్లల్లో ఇది ఎక్కువగా కనిపిస్తుంది.
ఇన్ఫ్లూయెంజా
ఇన్ఫ్లూయెంజా (ఫ్లూ) ఒక సాధారణ సీజనల్ వ్యాధి. కానీ ఇది నిర్లక్ష్యం చేస్తే ప్రాణాంతకంగా మారవచ్చు. ముఖ్యంగా చిన్న పిల్లలు, వృద్ధులు, గర్భిణులు ఫ్లూ వ్యాధిని జాగ్రత్తగా పరిగణించాలి. దీనివల్ల న్యుమోనియా రావడం, ఊపిరితిత్తులు ఇన్ఫెక్షన్ కావడం వంటి సమస్యలు రావచ్చు.
లక్షణాలు
- తీవ్ర జ్వరం
- దగ్గు, జలుబు
- ఒంటి నొప్పి
- గొంతు నొప్పి
- ఆయాసం
చికిత్స
ఇన్ఫ్లూయెంజాకు ప్రత్యేకమైన చికిత్స లేదు. లక్షణాల ఆధారంగా చికిత్స చేస్తారు. ఫ్లూ పట్ల అప్రమత్తంగా ఉండాలి.
సీజనల్ వ్యాధుల్ని తప్పించుకోవడం ఎలా?
- 90% సీజనల్ వ్యాధులను జాగ్రత్తలతో తప్పించుకోవచ్చు.
- సీజనల్ వ్యాధుల లక్షణాలు కనిపిస్తే వెంటనే వైద్యులను సంప్రదించాలి.
- ముఖానికి మాస్క్ ధరిస్తే ఫ్లూ నుండి రక్షణ పొందవచ్చు.
- చేతులను శానిటైజ్ చేసుకోవడం ద్వారా వ్యాధుల నుంచి కాపాడుకోవచ్చు.
- భౌతిక దూరం పాటించడం ద్వారా వ్యాధుల వ్యాప్తి తగ్గిస్తుంది.
- చల్లటి పదార్థాలకు దూరంగా ఉండటం మంచిది.
- వేడి వేడి ఆహారాలు తీసుకోవాలి.
- ఊపిరితిత్తుల సమస్యలు ఉన్నవారు తెల్లవారుజామున, రాత్రి బయటకు వెళ్లకూడదు.
- చిన్నారులను సాధ్యమైనంత వరకు వెచ్చని వాతావరణంలో ఉంచండి.
