మాజీ మంత్రి, వైఎస్సార్సీపీ నేత విడదల రజని ఆంధ్రప్రదేశ్ సీఎం చంద్రబాబు పాలనపై తీవ్రస్థాయిలో విమర్శలు చేశారు. తాడేపల్లిలోని వైఎస్సార్సీపీ కేంద్ర కార్యాలయంలో గురువారం ఆమె మీడియా సమావేశం నిర్వహించారు. ఈ సందర్భంగా చంద్రబాబు ప్రభుత్వం తీసుకుంటున్న విధానాలను ఆమె తప్పుపట్టారు.
ఆర్థిక అభివృద్ధి పేరిట కేవలం చంద్రబాబు అనుయాయులకు మాత్రమే లాభాలు చేకూరేలా పాలన సాగుతోందని, పేదలు, మధ్యతరగతి ప్రజల సంక్షేమం పూర్తిగా మరిచిపోయిందని మండిపడ్డారు. కరోనా లాంటి విపత్కర పరిస్థితుల్లో వైఎస్ జగన్మోహన్రెడ్డి అన్ని వర్గాలను ఆదుకున్నారని గుర్తు చేస్తూ, ప్రస్తుతం మాత్రం ప్రజల ఆశలు అడియాశలుగా మారిపోయాయని వ్యాఖ్యానించారు.
ఆరోగ్యశ్రీ బిల్లులు సకాలంలో విడుదల కాక ప్రజలు తీవ్ర ఇబ్బందులు పడుతున్నారని, ప్రభుత్వం ఆరోగ్య రంగంపై నిర్లక్ష్యంగా వ్యవహరిస్తోందని ఆరోపించారు. రైతుల సమస్యల పట్ల కూడా ప్రభుత్వం సమర్థంగా స్పందించడంలేదని విమర్శించారు. కొత్త పరిశ్రమల గురించి ఎలాంటి ప్రణాళికలు లేకుండా, ప్రతి పథకాన్ని పీపీపీ మోడల్లో మార్చేందుకు ప్రయత్నించడం బాధాకరమన్నారు.
వైఎస్ జగన్ హయాంలో రాష్ట్రవ్యాప్తంగా 17 కొత్త వైద్య కళాశాలలు మంజూరు చేశామని, కార్పొరేట్ స్థాయిలో ఆరోగ్య సంరక్షణ అందించడమే ప్రభుత్వం లక్ష్యంగా పెట్టుకుందని రజని అన్నారు. అయితే ఇప్పుడు ఆ మెడికల్ కాలేజీలను ప్రైవేటీకరించే కుట్ర జరుగుతోందని, తక్కువ ధరకు వాటిని లీజుకు ఇవ్వడం వెనుక లాభదాయక మాఫియా ఉండే అవకాశముందని ఆమె ఆందోళన వ్యక్తం చేశారు.
ప్రజల ఆరోగ్య భద్రత కోసం ప్రభుత్వానికి ఉన్న బాధ్యతను చంద్రబాబు ప్రభుత్వం విస్మరిస్తోందని, వైద్య రంగంలో తీసుకుంటున్న నిర్ణయాలు ప్రజా వ్యతిరేకమని విమర్శించారు. వైఎస్సార్సీపీ మళ్లీ అధికారంలోకి వచ్చిన తర్వాత మెడికల్ కాలేజీల ప్రైవేటీకరణను సమీక్షిస్తామని, ప్రజల ఆరోగ్యాన్ని కాపాడే చర్యలు తీసుకుంటామని విడదల రజని హామీ ఇచ్చారు.
గిరిజన ప్రాంతాల్లో వైద్య సేవలు అందించేందుకు జగన్ చేసిన ఏర్పాట్లను ప్రస్తుత ప్రభుత్వం ధ్వంసం చేయడం వల్ల ప్రజలు మళ్లీ డోలీలపై ఆసుపత్రులకు వెళ్లే పరిస్థితి ఎదుర్కొంటున్నారని ఆవేదన వ్యక్తం చేశారు.
Read More : యూట్యూబర్ సన్నీ యాదవ్ను అరెస్ట్?
One thought on “విడదల రజని : చంద్రబాబు పాలనపై ఘాటుగా స్పందన.”
Comments are closed.