హైదరాబాద్ మెట్రో రైల్ టికెట్ ధరల పెంపు పై నిర్ణయం ఏంటి? ఎల్ అండ్ టీ (L&T) ప్రభుత్వానికి విజ్ఞప్తి..

హైదరాబాద్ మెట్రో రైల్ (Hyderabad Metro Rail) నష్టాల భర్తీ కోసం టికెట్ రేట్లు పెంచేందుకు అనుమతి ఇవ్వాలని ఎల్ అండ్ టీ (Larsen & Toubro – L&T) సంస్థ రాష్ట్ర ప్రభుత్వాన్ని కోరనుంది. మెట్రో ప్రాజెక్టు నిర్వహణలో రోజుకు సుమారు రూ.కోటిన్నర నష్టం జరుగుతుందని, నష్టాలను తగ్గించేందుకు టికెట్ ధరలను సవరించాలని సంస్థ యాజమాన్యం ప్రభుత్వానికి విజ్ఞప్తి చేయనున్నట్లు సమాచారం.

మెట్రో నష్టాల పరిస్థితి

ప్రస్తుతం రోజుకు 5.10 లక్షల మంది ప్రయాణిస్తున్నప్పటికీ, తగిన ఆదాయం లేకపోవడం, నిర్వహణ ఖర్చులు పెరిగిపోవడంతో నష్టాలు అధికమవుతున్నాయని ఎల్ అండ్ టీ సంస్థ పేర్కొంటోంది. మెట్రో నిర్మాణానికి అప్పట్లో అంతర్జాతీయ బ్యాంకుల నుంచి తీసుకున్న రుణాలపై వడ్డీ చెల్లింపులు పెద్ద భారం అవుతున్నాయని, కరోనా (COVID-19) సమయంలో వచ్చిన ఆర్థిక సమస్యల నుంచి ఇప్పటికీ పూర్తిగా కోలుకోలేదని వివరిస్తోంది.

మెట్రో టికెట్ ధరల పెంపు ప్రతిపాదన

హైదరాబాద్ మెట్రో రైల్ ప్రాజెక్టు ప్రారంభమైన తర్వాత ప్రయాణ చార్జీలు కనిష్ఠంగా రూ.10, గరిష్ఠంగా రూ.60గా ఉన్నాయి. అయితే ఎల్ అండ్ టీ సంస్థ టికెట్ ధరలను కనిష్ఠం రూ.20, గరిష్ఠంగా రూ.80 వరకు పెంచేందుకు అనుమతి కోరనుంది.

రాష్ట్ర ప్రభుత్వ వైఖరి

నష్టాలను పూడ్చుకునేందుకు టికెట్ రేట్లు పెంచే ప్రతిపాదనపై ప్రభుత్వం సానుకూలంగా స్పందించడానికి ఆస్కారం తక్కువగా కనిపిస్తోంది. కాంగ్రెస్ ప్రభుత్వం ప్రజలపై భారం వేయకుండా మెట్రో సేవలను పరిరక్షించాలనే ఉద్దేశంతో ధరల పెంపును ఆమోదించకపోవచ్చని సమాచారం. అంతేకాకుండా, ప్రభుత్వం ప్రస్తుతం మెట్రో రెండో దశ (Phase 2) నిర్మాణంపై దృష్టి సారించినందున, టికెట్ రేట్ల పెంపుపై కేంద్ర ప్రభుత్వానికి సిఫార్సు చేసే అవకాశాలు తక్కువగా ఉన్నట్లు చెబుతున్నారు.

Read More : TGSRTC, మెట్రో ప్రత్యేక ఆఫర్ – హైదరాబాద్ క్రికెట్ అభిమానులకు సులభతర ప్రయాణ సౌకర్యం..