ఇంటర్నెట్ డెస్క్: మహేశ్ బాబు (Mahesh Babu) హీరోగా రాజమౌళి దర్శకత్వంలో ఓ చిత్రం త్వరలోనే రానుంది. ‘SSMB 29’ గా ఈ చిత్రాన్ని ప్రస్తావిస్తున్నారు. ప్రస్తుతం సినీప్రియులు దీనికి సంబంధించిన అప్డేట్స్ కోసం ఎదురుచూస్తున్నారు. ఇటీవలే ఈ చిత్రంతో సంబంధం ఉన్న కొన్ని వార్తలు సోషల్ మీడియాలో వైరల్ అయ్యాయి. ఇండోనేషియా నటి చెల్సియా ఎలిజబెత్ ఇస్లాన్ ఈ చిత్రంలో హీరోయిన్గా నటించనున్నట్లు గతంలో ప్రచారం జరిగింది. ఇప్పుడు మరో నటి పేరు కూడా తెరపైకి వచ్చింది.
బాలీవుడ్ టాలెంటెడ్ హీరోయిన్ ప్రియాంక చోప్రా (Priyanka Chopra) ఈ చిత్రంలో నటించనున్నట్లు వార్తలు వస్తున్నాయి. ఆమెతో చర్చలు జరిపినట్లు టాక్ వినిపిస్తుంది. ఈ సినిమాలో హీరోతో పాటు హీరోయిన్ పాత్రకు ప్రాధాన్యం ఉంటుందని, ప్రియాంక ఈ పాత్రకు న్యాయం చేయగలదని చిత్రబృందం భావిస్తున్నట్లు తెలుస్తోంది. ఆమెను తీసుకునే ఆలోచనలో ఉన్నట్లు సమాచారం. ప్రియాంక కూడా ఈ సినిమాలో నటించేందుకు ఆసక్తిగా ఉన్నారని చెప్పబడుతుంది. ఈ పాత్ర కోసం ఆమె ప్రిపరేషన్ కూడా ప్రారంభించారని సమాచారం.
ఇక, ఈ చిత్ర షూటింగ్ ప్రారంభం గురించి తాజా అప్డేట్ కూడా సోషల్ మీడియాలో షేర్ అవుతోంది. ఏప్రిల్ నుండి ఈ చిత్రం రెగ్యులర్ షూటింగ్ ప్రారంభం కానున్నట్లు తెలుస్తోంది. దీనికి సంబంధించిన అధికారిక ప్రకటన కోసం అభిమానులు ఎదురుచూస్తున్నారు.
భారతీయ చిత్ర పరిశ్రమలో ఇప్పటివరకూ చూడని కొత్త ప్రపంచాన్ని రాజమౌళి (SS Rajamouli) ఆవిష్కరించబోతున్నారని రచయిత విజయేంద్రప్రసాద్ గతంలో ఓ ఇంటర్వ్యూలో తెలిపారు. ఈ నేపథ్యంలో ఈ చిత్రంపై అంచనాలు రెట్టింపు అవుతున్నాయి. అమెజాన్ అడవుల నేపథ్యంలో సాగే ఈ కథలో పలువురు విదేశీ నటులు కనిపించనున్నారు. ఈ చిత్రాన్ని భారతీయ భాషలతో పాటు, విదేశీ భాషల్లోనూ అనువదించనున్నారు. దుర్గా ఆర్స్పై కె.ఎల్. నారాయణ ఈ చిత్రాన్ని నిర్మిస్తున్నారు. వెండితెరపై మహేశ్ బాబు సరికొత్త లుక్లో కనిపించనున్నారు. ఈ పాత్ర కోసం ఆయన సన్నద్ధమవుతున్న విషయం తెలిసిందే. మరోవైపు, రాజమౌళి కూడా ఈ చిత్రానికి సంబంధించిన పనులు ప్రారంభించేశారు. ప్రస్తుతం లొకేషన్ల కోసం సెర్చ్ చేస్తున్నారు.
