పాలమూరు–రంగారెడ్డి ప్రాజెక్టుపై అవినీతి ఆరోపణలకు ఆధారాల్లేవు.

పాలమూరు–రంగారెడ్డి ఎత్తిపోతల ప్రాజెక్టులో అవకతవకలు జరిగాయని ఆరోపిస్తూ మాజీ మంత్రి నాగం జనార్ధన్ రెడ్డి దాఖలు చేసిన పిటిషన్‌ను సుప్రీంకోర్టు శుక్రవారం తిరస్కరించింది. జస్టిస్ బీవీ నాగరత్న నేతృత్వంలోని ధర్మాసనం ఈ కేసును విచారించింది. పిటిషన్‌లో పేర్కొన్న ఆరోపణలు కేవలం వ్యక్తిగత అభిప్రాయాలు మాత్రమేనని, అవి న్యాయపరమైన ఆధారాలతో కూడినవిగా లేవని కోర్టు స్పష్టం చేసింది.

ఈ ప్రాజెక్టుపై ఇప్పటికే కేంద్ర పర్యవేక్షణ సంస్థ అయిన సెంట్రల్ విజిలెన్స్ కమిషన్ (CVC) సమగ్రంగా పరిశీలన జరిపిందని, ప్రాజెక్టులో ఎటువంటి అవినీతి లేదని తేల్చిచెప్పిందని ధర్మాసనం పేర్కొంది. ఇటువంటి పరిస్థితుల్లో సీబీఐ దర్యాప్తుకు ఆదేశించడం సమంజసం కాదని తేల్చి చెప్పింది.

పిటిషనర్ గతంలో ఇదే అంశంపై అనేక ప్రజాహిత పిటిషన్లు (PILs) దాఖలు చేసిన విషయం ధర్మాసనం గుర్తు చేసింది. వాటన్నింటినీ ఆంధ్రప్రదేశ్ హైకోర్టు (ప్రాజెక్టు ప్రారంభ సమయంలో ఉమ్మడి రాష్ట్రం ఉన్న నేపథ్యం) అప్పటికే తిరస్కరించిందని, ఆ తీర్పులను సవాలు చేసేలా సుప్రీంకోర్టుకు ఎలాంటి కొత్త కారణాలు చూపించలేదని కోర్టు వ్యాఖ్యానించింది. హైకోర్టు ఇచ్చిన తీర్పులో తగిన కారణాలు, న్యాయపరమైన బలమైన ఆధారాలున్నాయని కూడా ధర్మాసనం అభిప్రాయపడింది.

ఈ నేపథ్యంలో, ప్రస్తుతం దాఖలైన పిటిషన్‌కు అర్హత లేదని తేల్చిన సుప్రీంకోర్టు, పిటిషన్‌ను పూర్తిగా కొట్టివేసింది. ప్రాజెక్టు నిర్మాణంలో అవినీతి జరిగిందని ఆరోపించినా, దానికి సంబంధించిన ఎటువంటి ప్రాథమిక ఆధారాలు కూడా లేకపోవడంతో కోర్టు ఈ తీర్పును వెల్లడించింది.

ఈ తీర్పుతో పాలమూరు–రంగారెడ్డి ప్రాజెక్టుపై కొన్ని సంవత్సరాలుగా కొనసాగుతున్న ఆరోపణలపై న్యాయస్థాన పరంగా క్లారిటీ వచ్చినట్లు అయింది. రాష్ట్ర అభివృద్ధిలో కీలకంగా ఉన్న ఈ ప్రాజెక్టు నిర్భందంగా కొనసాగాలని రాజకీయవర్గాలు, ప్రజాప్రతినిధులు అభిప్రాయపడుతున్నారు.

Read More : తెలుగు రాష్ట్రాల్లో భారీ వర్షాలు