అశ్లీల, చట్టవిరుద్ధ కంటెంట్ను ప్రసారం చేస్తున్నాయన్న ఆరోపణలతో కేంద్ర ప్రభుత్వం మరోసారి కఠిన చర్యలు తీసుకుంది. ఉల్లు, ఆల్ట్, దేశీఫ్లిక్స్, బిగ్ షాట్స్ వంటి ప్రముఖ యాప్లు సహా మొత్తం 25 ఓటీటీ ప్లాట్ఫారమ్లు మరియు వెబ్సైట్లను నిషేధిస్తూ సమాచార, ప్రసార మంత్రిత్వ శాఖ (ఎంఐబీ) ఆదేశాలు జారీ చేసింది.
ఎంఐబీ ప్రకటన ప్రకారం, ఈ ప్లాట్ఫారమ్లు ఇన్ఫర్మేషన్ టెక్నాలజీ యాక్ట్, 2000 (సెక్షన్ 67, 67ఎ), భారతీయ న్యాయ సంహిత, 2023 (సెక్షన్ 294), మహిళల అసభ్యకర చిత్రణ (నిషేధం) చట్టం, 1986 (సెక్షన్ 4) వంటి పలు చట్టాలను ఉల్లంఘిస్తున్నాయి.
నిషేధిత ప్లాట్ఫారమ్లు
ఈ జాబితాలో ఉల్లు, ఆల్ట్, దేశీఫ్లిక్స్, బిగ్ షాట్స్, బూమెక్స్, నవరస లైట్, గులాబ్ యాప్, కంగన్ యాప్, బుల్ యాప్, జల్వా యాప్, వావ్ ఎంటర్టైన్మెంట్, లుక్ ఎంటర్టైన్మెంట్, హిట్ప్రైమ్, ఫెనియో, షోఎక్స్, సోల్ టాకీస్, అడ్డా టీవీ, హాట్ఎక్స్ వీఐపీ, హల్చల్ యాప్, మూడ్ ఎక్స్, నియాన్ ఎక్స్ వీఐపీ, ఫ్యూజీ, మోజీఫ్లిక్స్, ట్రైఫ్లిక్స్ వంటి యాప్లు ఉన్నాయి.
నివేదికలో ఏముందంటే
డిపార్ట్మెంట్ ఆఫ్ టెలికమ్యూనికేషన్స్ సమర్పించిన 90 పేజీల నివేదికలో ఈ ప్లాట్ఫారమ్లు కథాంశం లేకుండా కేవలం లైంగిక దృశ్యాలను ప్రదర్శిస్తున్నాయని పేర్కొంది. ఉదాహరణగా, ఆల్ట్లోని ‘కతిల్ హసీనా’ (సీజన్ 1, ఎపిసోడ్ 1)లో 22 నిమిషాల రన్టైమ్లో 5 నిమిషాలు, ఉల్లులోని ‘బదన్’ (ఎపిసోడ్ 11)లో 21 నిమిషాల్లో 19 నిమిషాలు పూర్తిగా లైంగిక కంటెంట్తో నిండి ఉన్నాయని వివరించింది. ఈ కంటెంట్కు సాంస్కృతిక లేదా విద్యాపరమైన విలువ ఏమాత్రం లేదని, కేవలం ప్రేక్షకుల లైంగిక ఆసక్తిని రేకెత్తించడమే లక్ష్యమని నివేదిక విమర్శించింది.
ఎంఐబీ ఈ ప్లాట్ఫారమ్లు ఇన్ఫర్మేషన్ టెక్నాలజీ (ఇంటర్మీడియరీ గైడ్లైన్స్, డిజిటల్ మీడియా ఎథిక్స్ కోడ్) రూల్స్, 2021ను కూడా ఉల్లంఘించాయని స్పష్టం చేసింది.
గతంలో కూడా ఇలాంటి చర్యలు తీసుకున్న ప్రభుత్వం, 2024 మార్చిలో 18 ఓటీటీ ప్లాట్ఫారమ్లను నిషేధించిన విషయం తెలిసిందే.
Read More : గాంధీనగర్ ప్రమాదం – టాటా సఫారీ వేగం కారణమా?
